Ұлыстың ұлы күнінде Экспо қалашығының аумағында этноауылға келушілер ұлттық астан дәм татып, мерекелік бағдарламаны тамашалады. Дәстүрімізді дәріптейтін ойын түрлері бойынша сынға түсіп, құнды жәдігерлер қойылған мұражайды аралады. Дүйім жұртты Елбасы құттықтап, барша қазақстандықтарға ақ жарма тілегін арнады.

Елордамызда «Есіл» ауданы, ЭКСПО қалашығы «Конгресс-орталығы», «Есіл» ауданы, «Жағалау» тұрғын үй кешені, «Сарыарқа» ауданы, қала әкімдігі алаңы және «Алматы» ауданы, «Қазақ елі» монументі алаңдарында мерекеге орай «қазақ күресі», «асық ату», «гір тасын көтеру», «қол күресі» және «арқан тартыс» спорттық іс-шаралары өткізіліп, жеңімпаздарға бағалы сыйлықтар табысталды. 

Наурыздың көркін өнерпаздар қыздыра түсті. Жез таңдай әншілер ән шырқап, күйшілер күмбірлетіп күй төкті. Балуандар күш сынасса, қыз-бозбала алтыбақан теуіп, сауық құрды. Ұлттық ойындар ойнатылып, жиналған қауымды бір серпілтіп тастады.

{gallery}news/2018/03/22{/gallery}